SafeJournalists: Mbroni gazetaren Gabrijela Radanović dhe ndalni kërcënimet drejt gazetarëve në Kroaci
Rrjeti SafeJournalists dënon ashpër kërcënimet, fyerjet dhe intimidimin ndaj gazetares Gabrijela Radanović, ndërsa ajo po hetonte aktivitetet ilegale të shoferëve të taksive të paautorizuara në portin e trageteve të Splitit.
Më 11 shtator, pas një thirrjeje nga punonjësit e Jadrolinija dhe Autoritetit të Portit, të cilët prej muajsh po përballeshin me ngacmime dhe sulme verbale, Radanović hapi një raportim mbi problemin e taksive pa licencë, të cilat pengonin punën e portit dhe përpiqeshin të abuzonin me turistët, duke u kërkuar çmime të tepruara. Gjatë hetimit, ajo u bë objekt i fyerjeve, ofendimeve seksiste dhe kërcënimeve, përfshirë një referencë të tmerrshme për vrasjen e gazetarit Ivo Pukanić.
Ky lloj sjelljeje është një përpjekje serioze për të intimiduar një gazetar dhe për të penguar punën e tij profesionale. Po ashtu, është një sulm ndaj të drejtës së publikut për të u informuar mbi praktikat e paligjshme që dëmtojnë qytetarët, turistët dhe shoferët e taksive të licencuar.
Ajo që është veçanërisht shqetësuese është fakti se punonjësit e portit, stafi i sigurisë dhe shoferët e licencuar kanë paralajmëruar për muaj me radhë për aktivitetet e paligjshme dhe sjelljet agresive të disa individëve. Megjithatë, përkundër këtyre njoftimeve, institucionet përgjegjëse – përfshirë inspektoratin e trafikut, policinë, autoritetet doganore dhe shërbimet e qytetit – nuk kanë reaguar siç duhet. Në vend që gazetarët të veprojnë si inspektorë, është detyrë e shtetit të zbatojë ligjin dhe të mbrojë ata që denoncojnë shkeljet.
SafeJournalists kërkon që autoritetet, përfshirë policinë dhe Prokurorinë e Shtetit të Republikës së Kroacisë, të hetojnë menjëherë kërcënimet ndaj Gabrijela Radanović, të identifikojnë personat përgjegjës dhe të sigurojnë sigurinë e saj. Gjithashtu, i bëjmë thirrje të gjitha institucioneve kompetente që të sigurojnë kushte të sigurta për gazetarët, në mënyrë që ata të mund të kryejnë punën e tyre pa pengesa.
Sulmet ndaj gazetarëve nuk janë thjesht incidente të veçanta – ato janë sulme direkte ndaj lirisë së medias dhe vlerave demokratike. Gazetarët duhet të kenë mundësinë të punojnë në kushte të sigurta, sepse çdo kërcënim ndaj tyre është një kërcënim ndaj të drejtës së publikut për të njohur të vërtetën.
Çdo sulm ndaj gazetarëve është një sulm ndaj demokracisë, interesit publik dhe të drejtave themelore të njeriut.
Prishtinë – Shkup – Sarajevë – Zagreb – Beograd – Podgoricë, 18 shtator 2025
Asociacioni i Gazetarëve të Kosovës
Asociacioni i Gazetarëve të Maqedonisë
Asociacioni i Gazetarëve të Bosnjës dhe Hercegovinës
Asociacioni i Gazetarëve të Kroacisë
Asociacioni i Pavarur i Gazetarëve të Serbisë
Sindikatat e Medias së Malit të Zi
