SafeJournalists: Kërcënimet ndaj Vuk Cvijić dhe redaksisë së Radar në Serbi duhet të hetohen urgjentisht dhe të ndëshkohen
Rrjeti SafeJournalists dënon ashpër kërcënimet ndaj gazetarit Vuk Cvijić dhe redaksisë së javores Radar, të bëra përmes komenteve të publikuara në faqen e medias.
Sot, redaksia e Radar ka pranuar një sërë mesazhesh fyese dhe të drejtuara në mënyrë të qëllimshme në seksionin e komenteve, përfshirë edhe një kërcënim për dhunë fizike ndaj gjithë stafit redaktues, veçanërisht ndaj gazetarit Vuk Cvijić. Mesazhi kërcënues është publikuar si koment nën artikullin e Cvijić-it “Ne zbulojmë amendamentin e SNS-së në draft-Ligjin për Prokuroritë Publike – ndalimi i punës së Prokurorisë për Krim të Organizuar”.
Komenti përmban gjuhë urrejtjeje, fyerje dhe një kërcënim të qartë për dhunë fizike. Përdoruesi me llogarinë “Miša” ka shkruar, ndër të tjera: “Do ta merrni atë që keni kërkuar – një shkop në kokë”, duke i quajtur gjithashtu punonjësit e redaksisë “ustaashë” dhe “shkatërrues të Serbisë”, si dhe duke përdorur gjuhë urrejtjeje dhe ofenduese.
Rrjeti SafeJournalists i kujton publikut se kërcënime të tilla përbëjnë një rrezik serioz për sigurinë e gazetarëve dhe një përpjekje për t’i frikësuar ata dhe redaksitë, me qëllim që t’i pengojnë të raportojnë për çështje me interes të qartë publik, përfshirë temat që lidhen me reformën në drejtësi dhe punën e shërbimit të prokurorisë. Kërcënimet online krijojnë një klimë frike, nxisin agresion të mëtejshëm dhe mund të përshkallëzohen në dhunë fizike, veçanërisht kur mbeten të pandëshkuara. Është veçanërisht shqetësuese që këto kërcënime i drejtohen një gazetari që prej vitesh është ekspozuar ndaj presioneve, sulmeve dhe shënjestrimeve të vazhdueshme.
Është gjithashtu e rëndësishme të theksohet se Cvijić është sulmuar fizikisht në disa raste, përfshirë edhe nga zyrtarë policorë. Ai është sulmuar nga bashkëpronar i Srpski telegraf, Milan Lađević, i cili e ka goditur në fytyrë. Më pas, ai u sulmua nga pjesëtarë të njësive policore të ndërhyrjes gjatë raportimit nga një protestë studentore para Fakultetit Juridik, kur u godit me bërryl dhe me mburojë policore. Në një rast tjetër, atij iu hodh një substancë kimike e panjohur, sërish nga pjesëtarë të një njësie policore të ndërhyrjes.
Sipas bazës së të dhënave për kërcënime dhe sulme ndaj gazetarëve dhe mediave, të mbajtur nga Shoqata e Pavarur e Gazetarëve të Serbisë (IJAS), gjatë vitit të kaluar janë regjistruar dhjetë raste kërcënimesh dhe sulmesh që lidhen me Radar dhe gazetarin Vuk Cvijić.
Rrjeti SafeJournalists u bën thirrje Prokurorisë kompetente dhe Ministrisë së Punëve të Brendshme që urgjentisht të identifikojnë autorin e këtyre kërcënimeve, të zhvillojnë një hetim të plotë dhe të nisin procedurat përkatëse në përputhje me ligjin. Presim që institucionet ta trajtojnë këtë rast me seriozitetin që kërkon, duke pasur parasysh sulmet e mëparshme dhe rrezikun e vazhdueshëm për sigurinë e gazetarit dhe redaksisë.
Rrjeti SafeJournalists do t’i informojë aktorët përkatës kombëtarë dhe ndërkombëtarë për këtë rast.
Çdo sulm ndaj gazetarëve është sulm ndaj demokracisë, interesit publik dhe të drejtave themelore të njeriut.
Prishtinë – Shkup – Sarajevë – Zagreb – Beograd – Podgoricë – Tiranë, 16 janar 2026
Shoqata e Gazetarëve të Kroacisë
Asociacioni i Gazetarëve të Kosovës
Shoqata e Gazetarëve të Maqedonisë
Shoqata e Gazetarëve të Bosnje dhe Hercegovinës
Shoqata e Pavarur e Gazetarëve të Serbisë
Sindikata e Mediave të Malit të Zi
